1. grein
Félagið heitir Landvarðafélag Íslands.
Félagið heitir á ensku The Ranger Association of Iceland.
2. grein
Heimili þess er Grettisgata 89, 105 Reykjavík, netfang landverdir@landverdir.is og veffang www.landverdir.is.
3. grein
Tilgangur félagsins er:
a. að vinna að hagsmunum félagsfólks og vera forsvarsaðili þeirra út á við,
b. að semja um kaup og kjör landvarða,
c. að marka stefnu landvarða í náttúruverndarmálum,
d. að svara erindum sem beint er til félagsins og vinna greinargerðir um náttúruverndarmál og að vinna að náttúruvernd og umræðu um hana.
e. að kynna stefnu þess út á við og vinna að framgangi hennar,
f. að kynna starf og hlutverk landvarða,
g. að stuðla að fræðslu og símenntun landvarða,
h. að rækta tengsl við systursamtök erlendis,
i. að standa fyrir skemmtunum fyrir félagsfólk.
4. grein
Félagi í Landvarðafélagi Íslands getur orðið hver sá:
a. sem lokið hefur námskeiði til starfsmenntunar landvarða,
b. sem lokið hefur öðru því námi sem félagið metur gilt,
c. sem vinnur við eða hefur unnið landvörslutengd störf.
Þau sem falla undir lið a) eiga sjálfkrafa rétt til aðildar en þau sem falla undir liði b) eða c) þurfa að fá samþykki stjórnar félagsins.
Þau sem ekki uppfylla skilyrði a-c en vilja vinna að stefnu og lögum félagsins geta sótt um aukaaðild að félaginu. Aukaaðild veitir ekki atkvæðisrétt á aðalfundi.
5. grein
Einstaklingar, fyrirtæki, stofnanir og samtök sem kjósa að styrkja félagið með fjárframlögum geta sótt um sérstaka styrktaraðild að félaginu til stjórnar. Hún metur hverja umsókn fyrir sig og ákveður hvort og þá hvernig styrktaraðild verður háttað.
6. grein
Heimilt er löglega boðuðum félagsfundi að vísa félögum úr félaginu ef fundurinn telur að þau hafi brotið í bága við lög félagsins. Slík tillaga verður að njóta stuðnings minnst 2/3 atkvæða fundarfólks.
7. grein
Hafi meðlimur í Landvarðarfélagi Íslands ekki greitt félagsgjöld í tvö ár frá aðalfundi er stjórn heimilt að taka nafn einstaklingsins af félagaskrá.
8. grein
Starfssvið stjórnar Landvarðafélags Íslands er:
a. að kynna stefnumál og starfsemi félagsins og vera andlit þess út á við,
b. að halda úti vefsíðu um málefni félagsins,
c. að marka stefnu félagsins í náttúruverndarmálum og vinna að henni með öðrum félögum og stofnunum,
d. að bera ábyrgð á fjárreiðum félagsins,
e. að ganga frá ákvörðun um trúnaðarmenn fyrir komandi sumar,
f. að samþykkja inngöngu nýs félagsfólks,
g. að hafa yfirsýn yfir starfsemi nefnda á vegum félagsins,
h. að efla áhuga félagsfólks á starfsemi félagsins og metnað þeirra fyrir hönd þess.
9. grein
Á vegum félagsins starfa fastanefndir. Kosið er um alla meðlimi þeirra til
eins árs í senn og þeir skipta með sér verkum. Aðalfundi og/eða stjórn er heimilt að víkja frá tilgreindum fjölda nefndarmanna ef þurfa þykir. Nefndirnar eru:
a. Kjara- og laganefnd, sem í eru 3 félagar og tveir til vara. Hlutverk hennar er að semja við vinnuveitendur um kaup og kjör landvarða, auk
þess að yfirfara lög félagsins fyrir aðalfund ár hvert.
b. Fræðslu- og skemmtinefnd, sem í eru 3 félagar. Hlutverk hennar er að sinna fræðslu og upplýsingamiðlun til félagsfólks, sem og að
skipuleggja skemmtanir félagsins.
c. Alþjóðanefnd, sem í eru 3 félagar. Hlutverk hennar er að halda utan um samskipti við erlend samtök landvarða og sjá til þess að miðla áfram efni er frá þeim berst til annars félagsfólks.
10. grein
Á aðalfundi hvert ár skulu kosnir tveir skoðunarmenn reikninga, sem ætlað er að yfirfara reikninga félagsins. Reikningsár félagsins er frá 1. janúar til 31. desember.
11. grein
Stjórn félagsins boðar til félagsfundar þegar henni þurfa þykir, eða ef minnst 15 meðlimir félagsins óska þess. Félagsfundir skulu boðaðir með minnst 3 daga fyrirvara og skal þá miðað við póststimpil og/eða dagsetningu tölvupósts. Dagskrár skal getið í fundarboði.
12. grein
a. Aðalfundur skal haldinn eigi síðar en 10. apríl ár hvert. Skal stjórn boða til hans rafrænt, með a.m.k. þriggja vikna fyrirvara. Ítrekun skal senda eigi síðar en 3 dögum fyrir aðalfund. Í fundarboði skal birta dagskrá fundarins ásamt lögum félagsins. Aðalfundur hefur æðsta vald í öllum málum félagsins og telst löglegur, ef löglega er til hans boðað.b. Dagskrá aðalfundar er:
1. Setning aðalfundar og kosning fundarstjóra.
2. Skýrsla stjórnar og umræður um hana.
3. Endurskoðaðir reikningar lagðir fram og umræður um þá.
4. Lagabreytingar.
5. Ákvörðun félagsgjalda.
6. Kosning stjórnar.
7. Kosningar í nefndir og kosning endurskoðenda.
8. Önnur mál.
c. Stjórn félagsins er skipuð 5 félögum, auk tveggja varamanna. Forseti og varaforseti skulu kosnir sérstaklega. Forseti er oddviti stjórnar og stýrir fundum hennar. Í samráði við stjórn ber forseti ábyrgð á að starfsemi félagsins fari samkvæmt lögum. Varaforseti sinnir forystustörfum með forseta og gegnir störfum forseta í forföllum hans. Stjórnarmeðlimir skipta með sér hlutverkum ritara, gjaldkera og meðstjórnanda. Ritari sér um ritun fundargerða á stjórnarfundum. Gjaldkeri er ábyrgur fyrir fjárreiðum félagsins. Meðstjórnendur sinna öðrum verkum sem stjórn ákveður. Stjórn skal á fyrsta fundi skipta með sér verkum og setja sér skriflegar verklagsreglur til að vinna eftir. Hún er kosin til tveggja ára í senn, þannig að eitt ár er kosið um forseta og tvo stjórnarmeðlimi og annað ár um varaforseta, einn stjórnarmeðlim, auk tveggja varafulltrúa. Kosningarétt og kjörgengi hafa allir skráðir félagar. Til að hljóta kosningu nægir frambjóðanda einfaldur meirihluti. Hverfi stjórnarmeðlimur frá störfum, skal stjórn velja annan varafulltrúa til að taka sæti í henni fram að næsta aðalfundi. Að svo búnu skiptir hún með sér verkum á ný. Hverfi forseti frá störfum skal varaforset taka sæti hans.
d. Ályktanir aðalfundar teljast samþykktar, ef einfaldur meirihluti fundarmanna styður þær.
e. Lagabreytingatillögur skulu berast stjórn eigi síðar en tveimur vikum fyrir aðalfund og skulu þær kynntar í fréttabréfi sem sent er út (miðað við póststimpil og/eða dagsetningu tölvupósts) eigi síðar en viku fyrir aðalfund. Í því fréttabréfi skal einnig kynna fundarstað og tíma. Minniháttar breytingatillögur, að mati aðalfundar, er hægt að bera upp á fundinum og fá afgreiddar. Lagabreytingatillögur skulu studdar af 3/4 fundarmanna til að hljóta samþykki.
13. grein
Félagið getur með samþykki löglega boðaðs félagsfundar sótt um eða sagt upp aðild að sérsamböndum eða bandalagi, enda greiði a.m.k. 2/3 fundarmanna slíkri tillögu atkvæði. Tillaga um slíkt skal kynnt félagsfólki rafrænt minnst viku fyrir fund.
Lög þessi voru samþykkt með breytingum á aðalfundum félagsins þann 10. mars 2005, 7. mars 2007, 12. maí 2012, 17. mars 2021, 9.apríl 2024 og 25 mars 2026.